الموضوع: فتاة وأمين ..

وعليكم السلام ورحمة الله وبركاته

فضول ينتابني لمعرفة من هي الفتاة

من المتابعين بإذن الله ..

وفقك الله .

نحن بالإنتظااار ,,, مستر أحمد

سلامي على من حفظ حق والديه .. شلهم يوم الكبر وحطهم ف عيونه
على الله جنة الفردوس يجازيه ..مثل ما جازا والديه عياله يجازونه

بداية Part 1

مزنه زوجة نصيب تعيش مع ريلها وعيالها في مدينة العين رزقها الله بولد وبنت توأم الولد اسمه مبارك والبنت اسمها امـنه , حاولت تنجب عيال اكثر ولكن الله مارزقها الا هالاثنينه.

نصيب زوج مزنه انسان طيب وفي حاله تزوج من مزنه زواج تقليدي في العصر القديم ويشتغل في المستشفى سايق اسعاف , بنظام شفتات

مبارك ولد نصيب وولد مزنه وامنه اخته التوأم يدرسون في المدارس الحكوميه .

مزنه قاعده مع عيالها في الصاله مبارك كان يشوف التلفزيون وامنه كانت تقرا بعض الكتيبات والقصص ومندمجه

مزنه مع امنه

الام : امنه نشي فديتج هاتي لي كوب ماي
امنه : اوهووو كله انا كله انا ! ليش مايسير بروك
الام: عوذبلله انتي ماتعرفين تنفعين ؟؟
امنه : اعرف بس كله انا
مبارك: خلاص خلاص انا بيب فكينا من الحشره

سار مبارك ويب لامه كوب ماي وكمل اللي كان يتابعه في التلفزيون , وقعدت امنه تقرا القصص وكتيبات كانت عندها لين دخل ابوهم من الباب .. وسلم وقال لامزنه تعالي اباج شويه ..

مزنه : ها بو مبارك أمرني
نصيب : تعالي اباج نسير الغرفه

راحوا للغرفه وكانت مزنه مستغربه وحاسه انه فيه شيء عند نصيب يبى يقوله وبعد مادخلوا الغرفه قعد نصيب وويه مبتسم ومستانس على الاخر ومزنه متلهفه تبى تعرف شوه يبغي نصيب .. فسألته امرني؟ قالها سكري الباب تعالي قعدي اباج

مزنه : والله يابو مبارك تسكير الباب هذا هب على خير شي في خاطرك انته وشكله شي كبير بعد
نصيب : ههههه هيه عندي لج خبر
مزنه: خير
نصيب: عند الله خير يامزنه .. سوو لي تلفون من الديوان
مزنه: شوه عندهم
نصيب : بياخذون مزرعتنا وبيعاوضني عنها 14 مليون لان مركزها ياي عدال خطوط الغاز اليديده ومضطرين انهم يشلونها هي واكثر من مزرعه بس انا مزرعتي في النص
مزنه: الحمدلللله الحمدلله .. الله يطول عمارهم يارب ,
نصيب: صبري بعدني ماكملت لج السالفه هههه
مزنه: شوه بعد !
نصيب: غير الفلوس قالوا لو لي انه الشيخ سلطان امر لي ببنايه تجاريه في بوظبي كتعويض مستديم
مزنه: والله ... الحمدلله اللهم لك الحمد اللهم لك الحمد
نصيب : الحمدلله تطمنت علي مستقبل مبارك وامنه ومستقبلكم قبل لا اموت
مزنه : بسم الله عليك يابو مبارك لاتقول جيه فلوس الدنيا كلها ماتعوضني بك انته وعيالك
نصيب: ههههه الحينه اتريا التعويض بعرس عليج
مزنه : ياويللللللك بذبحها ههههه

عمت الساعده في بيت بو مبارك وكل واحد انغمر في الفرحه وقعد يخطط لمستقبله ويخطط لمشترياته اليايه ومزنه نذرت انها تبني مسيد وتوهبه كصدقه عن روح امها المتوفيه .
وبالفعل شهور معدوده واستلم نصيب المبلغ وكان يملك قطعة ارض منحه من الدولة وبنا بيت لعياله وتحسن وضعهم وقدم على التقاعد من العمل .

ومبارك قعد يخطط للعشر سنوات اليايه عشان يقص الليسن وياخذ رنج سبورت وامنه كانت تراقب طلبات مبارك وكل ما يطلب شي تروح من وراه وتقول لامها اريد مقابل طلب مبارك نفس المبلغ اذا كان الشي يختص بالاولاد واذا كان شي عام تطلب نفس الشيء حى لو ما كانت في حاجته

لاحظت الام تكرر هذا الشي من امنه وقعدت معاها وقالت لها يا امنه هذا اخوج ومالج في الدنيا حد غيره لازم تحبينه مثل ماتحبين نفسج وتخافين عليه ..

امنه : بس هذا حقي امي ليش تشترون له وانا لا
الام : يابنتي هذا ولدنا ونشتري له مثل مانشتري لج
امنه: برايه مايخصني انا هو كله يشتري اللي يباه عيل جذيه بيخلص فلوسنا
الام: لاتقولين جيه هذا خير من الله الحمدلله ونحن الحينه وايد عندنا فلوس لاتنسين عندنا بنايه تجاريه في بوظبي ترد كل سنه 11 مليون
امنه: هيه وكل هالملاين بعدين بياخذهن بروك انا بنت مالي حيله
الام : حسبي الله على شرج انتي وتفكيرج عنبوه انتي ياهل وجيه تفكرين الله يعيني عليج قوووومي منيه سيري عني

واضح جداً انه امنه تفكيرها يسبق سنها يمكن من الحقد او الغيره ولكن تبقى بنت صغيره في اول عمرها والدنيا تعلم الانسان اشياء وايد .

بس الام كانت دوم حاطه عينها على امنه وتراقب تصرفاتها , فحبت تخبترها أختبار من خلاله تعرف كيفية التعامل معاها , لان مزنه تبحث عن السعاده وعن راحة البال وعن تربية العيال بالطريقه الصحيحه ..

يتبع Part 2